පළමු පරික්ෂාව

රහස් පරීක්ෂක චක් කුරුණෑගලට පැමිණෙන විට හවස පහ පමණ වී තිබුණි. ගමන් විඩාව පසෙක ලා හේ අපරාධ ස්ථානය වෙත ගියේය. ඒ වන විටත් වටින් ගොඩින් අඳුර ගලා ඒමට පටන්ගෙන තිබුණු අතර හාත්පස පරිසරය කඩින් කඩ ඇද හැලෙන වැස්ස නිසා තෙත ස්වභාවයක් ඉසිලීය. සපත්තු පැළඳි දෙපා තණකොල වැවූ පොළොව මත තබමින් ඇවිදින කල "චිරිස් චිරිස්" හඬ නැඟුවේය. මළසිරුර නැරඹීමට එක් රැස් වූ ජනකාය විසින් ගෙමිදුල එකම මඩ ගොහොරුවක් බවට පත් කර තිබුණි. 

තමා කුඩා අවදියේ කියැවූ ෂර්ලොක් හෝම්ස් රහස් පරීක්ෂක කතාවල අපරාධ ස්ථානයට වෙනත් අය පැමිණ සාක්ෂි විනාශ කිරීම ගැන හෝම්ස් සෑමවිටම අකමැත්තක් දැක්වූ බව චක් සිහිකලේය. මිනීමරුවාගේ පා සළකුණු සොයාගැනීම කෙසේ වෙතත්, පා විලුඹ තෙක් මඩ තවරා නොගෙන නිවෙසට ගොඩ වීමටත් නොහැකි ආකාරයට ගෙමිදුල මඩ වී ඇත.  අඩිය තැබීමට මඩ නොවූ තැනක් සොයමින් මඳක් විපිළිසර වූ චක් වෙත ආයේ කණිෂ්ක නම් පොලිස් නිලධාරියා යි.

"මහත්තයා කවුද? මේක අපරාධයක් වෙච්ච තැනක්.. අවසර නැතුව එන්න බෑ.." යනුවෙන් පැවසූ කණිෂ්ක මොහොතක් චක් දෙස විමසිල්ලෙන් බැලීය. කණිෂ්ක වෙත තම හැඳුනුම්පත පෑ චක්, වටපිටාව දෙස නෙත් හෙලීය. "එන්න සර්.. මිනීමැරුම වුණේ ගේ ඇතුළෙ.." චක් අපරාධ පරීක්ෂකයෙකු බැව් හඳුනාගත් කණිෂ්ක ගරු සරු බවක් පළකරමින් චක්ව ගෙතුළට කැඳවීය. කණිෂ්ක වෙත මිත්‍රශීලී සිනාවක් පාමින් ඔහුගේ නම විමසා දැනගත් චක්, ගෙතුළට පා එසැවීය.

හවස පැමිණි අධිකරණ වෛද්‍යවරයා විසින් මළ සිරුර තවදුරටත් පරික්ෂා කෙරෙන බවත්, දැන් මළ සිරුර ඇත්තේ කුරුණෑගල මහජන රෝහලේ මෘත ශරීරාගාරයේ බවත්, ගමේ කිසිවෙකු මියගිය යුවතිය නොහඳුනන බව ප්‍රශ්නකිරීම් වලදී හෙළිදරව් වූ බවත් කණිෂ්ක පවසන්නට විය. මළසිරුර තිබුණු ස්ථානය සුදු පැහැ හුණු වලින් සලකුණු කොට තිබුණු අතර, මියගිය තරුණියගේ ගෙලෙහි වූ මරණීය තුවාලයෙන් ගලාගිය රුධිරයෙන් තෙත් වූ පලස තවමත් එහි විය. කුටියෙහි වූ අඩ අඳුර නිසා පරික්ෂා කිරීම පසු දිනට කල් දැමීමට චක් තීරණය කළේය.

චක්ට නවාතැන් හා ආහාර සැපයීමට නිවෙසේ අයිතිකරු වූ දර්ශන මහතා කැමැත්ත පළ කල බැව් කණිෂ්කගෙන් අසා දැනගත් චක් අසල්වාසී ඉඩමෙහි වූ කණිෂ්ක මහතා පදිංචි නිවස වෙත පියමැන්නේ ය.

දර්ශන චක් පිළිගත්තේ මහත් ගරු සරු ඇතිවය. කුරුණෑගල පොලිස් ස්ථානාධිපති උපුල් මහතා පැවසූ පරිදි චක් ඉතා දක්ෂ රහස් පරීක්ෂකයෙකි. නමුත් "චක්" යන නම දර්ශනව සිනා ගැන්වීමට සමත් විය. පළමුවෙන්ම ඔහුගේ සිහියට නැඟුණේ චක් නෝරිස් නම් නළුවෙකු රඟ පෑ රූපවාහිනී කතා මාලාවයි.

"නෑ නෑ.. චක් නෝරිස් නෙමෙයි." දර්ශනගේ දෙතොළ නැඟුණු මඳ සිනාවට හේතුව ඉවෙන් මෙන් වටහා ගත් උපුල් වහා පිළිතුරු දුන්නේය. "චක් කියල තමයි හැමෝම ඒ මහත්තයාව අඳුරන්නෙ.. ඇත්ත නම කවුරුත් දන්නෙ නැහැ.." යැයි පැවසීමට ද හේ අමතක නොකළේය. නිවෙසේ දොරකඩ සිටගෙන සිටි දැවැන්ත පුද්ගලයා චක් බව හඳුනාගැනීමට දර්ශන මහතාට හැකිවූයේ උපුල් විසින් සවස් කාලයේදී පෙන්වන්නට යෙදුණු ඡායාරූපය නිසාය.

චක්ට හිඳ ගැනීමට අසුනක් පැනවූ දර්ශන, අමුත්තාට තේ පිළියෙල කරන ලෙස සිය බිරිඳට දැන්වීමට නිවෙස තුළට පිය මැන්නේය. පුටුවෙහි හරි බරි ගැසුණු චක්, කල්පනාවට වැටුණේය.