මිනීමැරුමක්

කුරුණෑගල පොලිස් ස්ථානය

2012 මාර්තු 23 වැනිදා 

උදෑසන 10.43

2012 මාර්තු 23 වැනි දින උදෑසන කුරුණෑගල පොලිස් ස්ථානයට ලැබුණු දුරකථන ඇමතුම සැවොම විස්මයට හා තිගැස්මට පත් කිරීමට සමත් විය. දිවිනසා ගැනීම්, පිහි ඇනුම්, රණ්ඩු සරුවල් ගැන පැමිණිලි කෙසේ වෙතත් මිනීමැරුමක් ගැන අසන්නට ලැබෙන්නේ කලාතුරකින් බැවිනි. දුරකථන ඇමතුම ලබා ගත් පොලිස් නිලධාරිනිය දෙවන, තෙවන වරටත් ඈ වටා රොක්ව සිටි සහෝදර නිලධාරීන්ට ඇමතුම විස්තර කරමින් සිටියා ය. නවක පොලිස් නිලධාරීන් කිහිප දෙනෙකු මේ අරුමැති සිද්ධිය අසා උද්‍යෝගිමත් ව සිටියහ. 

එතැනට පැමිණි පොලිස් ස්ථානාධිපති තුමා වූ උපුල් ඒකනායක මහතාගේ ගැඹුරු කටහඬ පැණි හැලියට වහ වැටුණු කුහුඹු රැලක් මෙන් අලුත් ආරංචිය රස විඳිමින් හුන් පොලිස් නිලධාරීන් දෙපසට කිරීමට සමත් විය. 

"සාජන්ට් මේනකා, පීසී කණිෂ්ක, පීසී ලහිරු.. ලෑස්ති වෙන්න ක්‍රයිම් ඒරියා එකට යන්න මාත් එක්ක.. අනෙක් අය කතාව නවත්තල වැඩ කරන්න.."

උපුල් ඒකනායක මහතාගේ විධානයට අනෙක් පොලිස් නිලධාරීන් යුහුසුලු ව කීකරු වූහ.

කුරුණෑගල, පිලැස්ස නුවර පාරේ අංක 10 දරණ නිවස

2012 මාර්තු 23 වැනිදා

උදෑසන 11.27

පොලිස් ජීප් රියෙන් බිමට බට නිලධාරීන් තිදෙනා හා කාන්තා පොලිස් නිලධාරිනිය, ගෙමිදුලේ රැස් කමින් සිටි සෙනඟ අතරෙන් ඉදිරියට ඇදුනහ. එක පොදියට තෙරපෙමින් මළ සිරුර දැක ගැනීමට උත්සාහ දරන මිනිස් ගඟ දුටු වනම, උපුල් කෝපයෙන් වෙවුලා ගියේය. 

"මිදුලෙ, වත්තෙ පිටියෙ තිබ්බ අඩි සලකුණු ඔක්කොම මේ මිනිස්සු පාගල, මකල දාල ඇති.." 

යන අදහස හිතට නැඟුණු බැවිනි.

සෙනඟ කාරුණිකව පලවා හරින මෙන් කණිෂ්කට හා ලහිරුට දැනුම් දුන් උපුල් නිවෙස ඉදිරියේ සිටගෙන රැස් වූ අයට කරුණු පැහැදිලි කරමින් සිටි තලතුනා මහතෙක් වෙත ගමන් කළේය. සෙස්සන්ට වඩා යමක් කමක් වැටහෙන පෙනුමක් තිබූ හේ, උපුල් මහතා දැක තිගැස්සී ඉදිරියට පිනුයේ "මහත්තයා ආවාද? මම තමා කෝල් එක දුන්නේ.. මං මෙහෙ ග්‍රාමසේවක. ප්‍රසන්න කෝදාගොඩ.." කියමිනි.

ප්‍රසන්නගේ උරහිසට මිත්‍රශීලී තට්ටුවක් දැමූ උපුල්, "කෝ..  කොහෙද බොඩි එක තියෙන්නෙ?" යැයි විමසුවේය. ප්‍රසන්න දකුණතෙන් සන් කරමින් කඩි මුඩි ගමනින් ගෙතුළට පියමැන්නේය. උපුල් හා මේනකා ඔහු පසුපසින් ඇවිද ගියහ. 

නිවෙසේ සාලය මැද ජීවය රහිත කාන්තා මළ සිරුරක් වැතිර තිබුණි.